DISENYO NG PROYEKTO: ADBOKASIYA

Alinsunod sa katangiang taglay ng bansang Pilipinas na kung saan ito ay mayroong tatlong naglalakihang kapuluan – Luzon, Visayas at Mindanao – mahihinuha na ang mga lugar na nasasakupan ng bawat pulo ay may kanya-kanya ring kultura, paniniwala at wika. Ngunit, ang mga wikang ito ang nagpapalawak sa dating maliit na agwat ng mamamayang Pilipino. Kaugnay nito, ang dayalektong kanilang kinalakhan ay lubhang kaiba kung ikukumpara sa tanan na nagresulta sa isang lipunan na minsan ay hindi magkaunawaan. Ganunpaman, ang wika rin ang siyang nagbuklod sa mga dayalektong kanilang ginagamit sa pamamagitan ng pagtatatag ng isang wika na mauunawaan ng lahat – wikang tagalog. Dahil dito, wikang tagalog ang siyang gumawa ng isang tuwid na daan upang bigyan ng pagkakataon ang iba’t ibang tribo ng bansa sa pakikipag-ugnayan o pakikipagtalastasan sa bawat isa. Dagdag pa rito, waring ang wikang ito ang naging rason nang sa ganoon ay maging pantay ang pagtingin ng bawat Pilipino sa kapwa Pilipino upang magkaroon ng pagkakaisa na noon pa ay kanilang inaasam. Sa kabilang banda, ang wikang tagalog ang isa sa mga bagay na nagtutulak sa mga tao ng bansang Pilipinas at nag-sisindi ng apoy sa kanilang mga puso upang kanilang ipagmalaki na sila ay tunay na mga Pilipino. Samakatuwid, ito rin ang dahilan kung bakit hanggang ngayon ay nananaig ang respeto at pang-unawa ng bawat mamamayan sa kung anong katangian ang taglay ng bawat  tribo o pangkat ng mga tao.